الا يا وجودي وجد من لا حله برّاق

تخيله عيونه بس ما يا صله دربه

ولا يا وجودي وجد من حل فيه إغراق

تشوفه عيون الناس,, لكن تفكربه

والا يا وجودي وجد من يطلب الاعتاق

نهار الحكم صادر على غاربه ضربه

تفرّج عليه الناس مابه جدى واسباق

وضاقت عليه الارض,, والنفس مكتربه

على اللي سلب عقلي بنشوة لقا واعناق

تنحى عنه دربي وهو انتحى سربه

ذكر لي بلحظة شوق والشوق للعشاق

كما رمح خيال يعوض عن الحربه

زرق في نحر فارس نهار النضا وانباق

وخلاّ جميع الناس في صوت تجهر به

اخيله بطول الوقت في تالي الاعماق

يجيني مع الانفاس وارتاح واسهر به

ذبحني افراقه ذبح والبعد ما ينطاق

طوى قلبي الضامي من الزين واسعر به

تفارقت انا وياه ما وردنا بفراق

حدتني ظروف البعد والدار والتربه