تعلّم السباحة والرماية مع ركوب الخيل

على ضو الحديث اللي ورد فالسنه الغرّا

عراب الصافنات المكرمات الضامرات الحيل

نواصيها معاقد خير فالسراء وفالضرّا

سري بخيارها في ليلة المعراج تال الليل

الا ياكبر فضل الخيل ياللي عنه مغترّا

تمعن في ثنايا العاديات بمحكم التنزيل

وتلقاء فضلها مذكور فالآيات ومورّا

تذكر بدر والعسرى وجيل جاء بداله جيل

فتوحات شهيرة في عصور الكر والفرّا

عليها رآية التوحيد والتكبير والتهليل

تبوج الارض بيديها وتقطع دابر الشرّا

غذاها يوم صلفات السنين ويوم عسر الكيل

غمور التمر والبر الحمر ومبرد الدرّا

لها تاريخها المشرق ولا في عزها تبديل

على جرة حوافرها الدسم يشبع به الذرّا

تراث اجدادنا وامجادهم من قبل عام الفيل

عليها يلبسون الجوخ وقت البرد والحرّا

ليال مالحقناها على الزلبات حط وشيل

تخالف بالسباع الضاريه والجو مغبرّا

وذلحين نتفرج فالسبق بالعين والدربيل

وهذي خيل تبيع وهذي خيل تشرّا

لعل عيال عز الخيل فيها العز والتجميل

ويرجع من يلز ابها من الميدان مسترّا

والانتاج الاصيل اللي من اساسه وابوه اصيل

اخير من الجواد اللي يجي للناس من برّا