اميه سنة فيها تحقق للاجيال
مجد سرى لالفين سنة جديده
حلم بدابه شيخ مع كم رجال
مبداهم التوحيد فعل وعقيده
زهابهم غير التمر اقط وادلال
وقلوب اصفى والخواطر قصيده
ركبوا عليهن عزمهم ينهض جبال
واجسادهم فوق الاصايل زهيده
كل ترك من بندقه فوقه ظلال
واطلق رسنها يمسك الموت بيده
فزن وراهن عجهن كنه خيال
قدح الحوافر برق يسمع رعيده
بيض النواصي فوقهن بيض الآمال
يتلون شيخ كنه الا طريده
حر شهر في نجد لاقواله افعال
بالموت حنى كل راس عنيده
لين استوت له مهرة دون خيال
واصخى لها من كل شيء تريده
وارسى دعايم حكمها بعده عيال
ما حد تخاذل بينهم عن عضيده
تشايلوا ما بينهم ثقل الاحمال
يمنى بلا يسرا تترك وحيده
وحل الوفى واسترسلوا طيب الفال
عقب الفقر والخوف حال سعيده
وحدة وطن ما هي سواليف تنقال
اللي بناه سعود فيصل يزيده
وراحت لخالد وردها جم وزلال
عهدٍ بدا للشعب ينثر حصيده
والموت حقٍ ما وقف دونه ابطال
يا الله عساه ارواحهم لك شهيده
وجت له تجر خطاه وحموله اثقال
وقت تغير والعواصف شديده
حال القمر لا من كمل عود هلال
صار الزمن يفرض عليها جحيده
وابدى لها من فزعته هم جمال
شاف المنية بالعيون الجهيده
واصغى لها من حكمته تشرح الحال
مع كل هم قيل يسمع نهيده
قالت همومي يا الفهد ما هن قلال
قال الله اقوى والعواقب حميده
قامت وهي من فرحته بس تختال
يومٍ عن التاريخ يرفع رصيده
رمز بني للعلم مارد ومنهال
حتى استوى بالعلم عبدٍ وسيده
اللي بذل روحه لنا واشغل البال
ما ذاق طعم النوم عينه سهيده
قاد الجحافل والعدو شاف الاهوال
ما فادهم جمع البشر وتحشيده
لنسورنا من عالي المجد منزال
ونمورنا ما حسّبت لتهديده
شهبٍ تهاوت بالسماء ترسم اشكال
وامواج نارٍ للمعادي تبيده
صب الغضب واضحت بقاياهم اطلال
يوم اللحم به يختلط مع حديده
رد الكويت لشعبها وافي خصال
فزعة سعودي تنتفص في وريده
يا الله طلبتك وارفعوا كف الاذلال
يا واحد بقلوبنا نستعيده
انت الذي من رحمتك سقت الآجال
وانت الذي ما غاب عنا وعيده
تجعل حصايد ما فعل صالح اعمال
يا قف بهن في يوم ينفع رصيده
واحفظ لنا بحماك عن كل محتال
امنٍ سكن ببلاد وارضٍ بعيده
في ظل ابو فيصل عصى الحقد ما طال
حكومة بهداية الله رشيده
فيها لابو متعب مع الحق فنجال
وايدٍ على شر النوايا عتيده
واله الشهامه تنتخي ميله عقال
وفيه المكارم مانطول تعديده
اليا وقف في هيبته كل الازوال
واليا جلس في مجلسه من يفيده
قلبٍ به الفطنة وقول عن امثال
من حكمته حتى الخطا فك قيده
وفيها لابوخالد من للخير شلال
للي شكى دنياه واللي وحيده
منه الكرم صابه سبب فعله هبال
وصار الكرم سلطان شعب يسيده
كل الصعايب وان حضر اسمه هزال
وكل المعاني دون حقه بليده
فعله رسم في طلعته قوس همال
واسمه تسماه المطر بالنشيده
ومنا لابو تركي مع الصبح مرسال
لا نسنس الغربي وحرك جريده
تحية فيها عزا حب واجلال
يوم الوطن بايعك بيعه جديده
