عشر رمضان التاليه يوم الاثنين
خذت الخبر من صفحةٍ في الجريده
علمٍ طرد نوم الكرى ما يجي العين
واسترسلت عيني دموعٍ جديده
على النديم اللي على الزين والشين
لعل روحه عند ربه شهيده
مرحوم يازيزوم ربع مسمين
مدهال عطران الشوارب فقيده
راس الوهابا لاغدى العلم علمين
صياد فرزين الوغا ما تصيده
عبدالرحمن الليا غدى زينها شين
هدى زعانيف الرجال العنيده
من كاله بصاع له كال صاعين
وتسانده يمنى الوهيبي عضيده
قاسي على قاسي وريف المساكين
وليتا يقل مثله وليده
ما قال أنا لضد بالين وزين
قلبه حجر وضلوع قلبه حديده
خلى صحاري البر تين وبساتين
خلاه غرس زاهين به جريده
رد الخصيم يسار مارده يمين
وقع بعشره وعاهده ما يعيده
خلى غصيبه وين من وين لوين
هو مات راسه في المعالي بعيده
ليته خذا له في حياته ثلاثين
فضلٍ من المولى حياة سعيده
ناخذ معه سجات مادام حيين
وكل من الحسنات يلحق رصيده
والا فنا وياه بعشر الثمانين
عندي خبر زرع تدانا حصيده
ياالله يااللي له عباده ملبين
عسى صحايفنا تجينا حميده
لاسكّتونا وقربوا الموازين
كل يجي عضوه خصيمه ضديده
برحمتك يارحمن لأمرك مطيعين
إفزع لنا بيوم أهواله شديده
