أدراك يا قلبي على شان غاليك
خلك وانا بحماك لفح الذواري
إسكن سويداء القلب وارتاح وش فيك
ما تشوف قلبي لك رياض وبراري
بين الحنايا داخل الصدر مخفيك
واقول مدري بك وانا كنت داري
اصدح اعلن باسمك ومرات اناجيك
ومرات تشغلني عليك الطواري
اسمع نداءك بغفوتي واحلم اجيك
على صدى صوتك تحوّل مساري
صوتك هو احلى فصل في عمر مغليك
يدخل مدارات الفضاء بي جباري
ليت وعسى تسمع نداء صوت داعيك
ولا تترك الساري يلوم الغداري
عطني حنان شويّ وازيد وأعطيك
فايض حنان ضام خد الصحاري
واشعل مصابيح الغلا عند طاريك
وأفز وأسري لك وأنا كنت ساري
أشرب عطش واثريني أصبحت ضاميك
والبرد يزعجني على جال ناري
يا شايله قلبي على كفوف أياديك
ضمّيه يمك لا يحين انتحاري
