والله لونه جاك شي يجيني

انك من اللوعات لتعض الابهام

والله لتبقى طول وقتك حزيني

وتصير من كثر البهاذيل منضام

والله ليسهرك البكا والونيني

وتسهر عيونك والمخاليق نيّام

والله لتظهر كل خافي الكنيني

ويجيك ما سويت حتى بالاحلام

هذي تراها حالتي يا ضنيني

الشاهد اللي نزل اقرأ والانعام

اصبر واقول الزين يمكن يجيني

اصبر الخافق على مر الايام

خل الجفالين الخوافي تبيني

لا لا يغير نظرتك هرج نمام

تراك وسط القلب قدرك ثميني

حتى ولو صديت ستة عشر عام

الشاهد اللي للخلايق عويني

فارض علينا حجة البيت بحرام

انك بوسط الجوف مالك وزيني

وحبك ملحم داخل القلب بلحام

وان غاب ضني وش بقى في يديني

ما باقي الا احكم على النفس باعدام

ماعاد ابا ما باقي من سنيني

تكفيني اللي حطته في الاوهام

وعداد ما تطلع نجوم وتبيني

صلوا على اللي مكمل دين الاسلام