كل ما قلنا كبرنا جهلنا من جديد
مدري الايام والا العقول الخاويه
هزني بشويش هز النسايم للجريد
طاري اللي له على القلب جمره كاويه
يوم مرت ذكريات من الماضي البعيد
حركت في وسط قلبي غصون ذاويه
يا مراهيل الصبا ليت لي قلب بليد
عنده ايام الزمن كلها متساويه
جيت عابر درب مرار في حالي وحيد
ارمي النظره على كل ركن وزاويه
جيت مشلول الهقاوي من الحظ العنيد
ساقني سوق المراويح يم الهاويه
كل بادي شمس اجدد طموحي واستعيد
ركضي البارح لو ذياب همي عاويه
ابتسم يا فجر الاحلام ما فيني مزيد
للعذاب اللي بعيني شموعه ضاويه
انكسر مدي على صخرة امالي شهيد
والبشاير ما اقبلت بالفرح متخاويه
والا كيد ان الاماني امامي ماتفيد
من يعلقها رجاويه ماتت ثاويه
