قال: السلام عليكم قلنا: وعليكم السلام ورحمة الله وبركاته قال: ممكن ارسل لكم قصيدة وتنشرونها قلنا: نتشرف يا خي ارسلها على الفاكس او بالبريد قال: بس عندي اسم مستعار تنشرونه قلنا: اكيد بس ارفق اسمك الحقيقي معه قال: طيب باسمعكم قصيدتين اختاروا واحدة منهم قلنا في انفسنا: (اهب يا ابن لعبون) عطنا اللي عندك قال: جيتك ولا جيتك ولكني جيت قلنا: بس بس الله يرحم والديك هذي وينها ووين الشعر قال: وش فهمكم بالشعر هذي موزونة قلنا: اجل حنا ما ننشر الا المكسور انشر عند غيرنا قال: والله تندمون وهذي ترى وقاحة!! قلنا: توكل هذي صراحة الوقاحة اني امشي بمثل خرابيطك واقول شعر,.
جاءت مكاملة اخرى بصوت آخر قالت انا شاعرة وعندي قصيدة قلنا نفس الكلام قالت بس اسمعوها اول قلنا تفضلي بدأت نفس بداية صاحبنا الاول في القوة! قلنا: يا ختي مع احترامنا لانوثتك الا انها ما هي شعر قالت:
طيب عارفة ما فيه اشكال سووا اللي تبغون فيها بس اهم شيء انشروا اسمي وبس!!؟
جاءت مكالمة اخرى وبصوت ناعم آخر قالت بعد السلام انا ارسلت بالفاكس قصيدة وابغاكم تنشرونها بس يا اخوان بدون حذف اي بيت منها لانها مثل عيالي قلنا الاسم قالت فلانه قلنا القصيدة مخرجة وفي طريقها للنشر بكره ان شاء الله قالت: سلام قلنا: وعليكم ويازين الواثق من نفسه.
** رأي:
يقولون بين الصراحة والوقاحة شعره ونقول يا خي هل اذا صفقنا وقلنا ابداع ستستريح وعندما تخرج نضعها في سلة المهملات أليست هذه هي الوقاحة,, ام الوقاحة في نظرك ان اخبرك بالخطأ الذي وقعت فيه لتنتبه له.
** فاصلة:
شاعرة تريد ان يظهر اسمها بأي شكل وتشترط ان تكون الفكرة فقط ملكها والوزن والقافية صناعة ثانية اذن لماذا لا تستقدمين عمال رسامين وتطرحين الفكرة لهم ويرسمون لك وتصبحين ايضا رسامة؟!!
** نهاية:
للشاعر الكبير زبن بن عمير رحمه الله:

ترى بعض السوالف فوق راعيها فضيحة يحسب انه مسويها وهو لاون صغاها يسولفها بعض ناسٍ يبي منها مديحه ياليته رد خنجرها تعود في خباها سباحينٍ يلفقها حدٍ ما هي صحيحه يفق افمه ويظهرها ولا يخشى خطاها ما يدري انه وراه رجال نقاده فصيحة يقصون السوالف لين تاصل منتهاها