واهني اللي عن الخفرات تايب
مهتني من عرض ناسٍ مستريحه
العذارى حبهن كله مصايب
كم قلوب من سبايبهن جريحه
عذبني غربلني بالنشايب
ضايقٍ في نجد والبيداء فسيحه
والسبايب واحدٍ عامين غايب
كان مت بسبته ما الله يبيحه
توني شباب مير الراس شايب
ليتني سمعت مهدين النصيحه
قلبي اللي سكرٍ في ماه ذايب
شاربه في كاس من عينه مليحه
المحبه حب مابين الحبايب
من مشى بالحب يامسرع مطيحه
ياهبوب الوسم هبي ياهبايب
إنقلي أخبار عن خلي صحيحه
ياعسى تجيبين ليه علم صايب
وصلي من ريحة المزيون ريحه
قالت أيّس مالكم يمه طلايب
ملك غيرك لاتعرض للفضيحه
الضلوع إمّزعه راحت حطايب
الأمل معدوم والدمعه صريحه
الأمل حطيت من فوقه نصايب
القدر لاحل مانقدر نزيحه