شبعت من الشعر واشبعت روحي

ولا داويت من شعري جروحي

كتبت الشعر في شتى المعاني

واشوف الهم عيا لا يروحي

ألا يا ناس ما ينفع بحالي

سوى اللي عالم علات روحي

اله الكون غفار الخطايا

عليم السر قبل احكي وابوحي

طلبت اللي اليا من شاف عبده

كسير القلب في ليله ينوحي

يروف بحال عبده لا درى انه

عن الزلات تايب له نصوحي

وانا يا رب مدري ويش اسوي

هوى نفسي له حصان جموحي

اليا حاولت احب اكبح جماحه

عصاني وانطلق ولو كان يوحي

ولي قلب عسى ما هوب قاسي

على العبرات من عيني شحوحي

يجيه الضرب من سوط المواعظ

واحس انه من الحسره يفوحي

ولكن لا غفل لو بس ساعة

بدت قسوته وازدادت وضوحي

وانا اعرف من يعيش الوقت لاهي

كما اللي يعبر الغبه بلوحي

يصير لعاتي الامواج لعبه

ويخاف ان شاف له برق يلوحي

إخذ يا لعبد من دنياك حذرك

تراها وان صفت سم ذبوحي

ولا يحذر من الدنيا وبلاها

سوى من كان للجنة طموحي

مهوب اللي عصى وان جاه ناصح

يقول اذنب ولي رب سموحي

خطا ما قلت يا مسكين ربك

شديد البطش لو تبصر وتوحي

عسى المعبود يعفو عن خطانا

كريم الصفح للزله دموحي

طبيب القلب من جرح براني

اعرف الشعر ما يبري جروحي