بسم الذي يحيى العظام الرميمة
ربٍ عظيم بالسما فوق عالي
مافيه نفسٍ فوقها مستديمة
والكل غير الله مصيره زوالي
راحت في امان الله روحٍ كريمة
روح الامير اللي بلاشك غالي
فيصل سليل المجد رمز الحشيمة
راع الكرم والجود زين الفعالي
ابن الفهد وابن الملوك العظيمة
من نسل ابو تركي عظيم الرجالي
فيصل وراها كل خطة حكيمه
قاد الرياضة وابدع بها المجالي
اسمٍ علىمسمى قوي العزيمه
كم مرةٍ يسر عسير المنالي
في قلبنا فيصل سكن في صميمه
ماهو غريبٍ دمعنا يوم سالي
انتم وانا ياهل العقول الفهيمة
والله ماننسى كريم الخصالي
كم دمعة من عين نفس يتيمة
بيده مسحها بدّل المر حالي
كم واحدٍ وظروف وقته تضيمه
كم واحدٍ شال الهموم الثقالي
شمله فيصل بالعطايا العميمة
ذاق الهنا من بعد سود الليالي
فيصل حنان وطيب نفسه رحيمه
مافيه لاكبر ولابه تعالي
عساك يافيصل بجنة نعيمه
في جنة الباري عزيز الجلالي
يرحمك ربي عد ماهل غيمه
واعداد مانسنس هبوب الشمالي
