ذبوا البشوت,, وهلت العين عبرات
من رهبة الموقف,, وهول الفجيعه
شالوا على الأكتاف شيخ المروات
للحفرة اللي يا عساها وسيعه
لعلها روضة من رياض جنات
ويوم الفزع والحشر طه شفيعه
حيثه ملاذ في صعيب المهمات
والطيب حازه بين ورث وطبيعه
ابن الملوك اهل الفعول العظيمات
اهل السيوف اللي تحرس الشريعه
ما ينحصي جوده بكلمات وابيات
ولا بنبضات القلوب الصريعه
اللي عقب فجيعة الموت حزنات
كنه تقطعها حدود وريعه
يا لله يا علام كل الخفيات
رب القلوب العاصية والمطيعه
تجعل لفيصل في الجنان الوسيعات
منازل من فضل جودك رفيعه
وتزيد حسناته برحمتك حسنات
وتبري قلوب عقب فقده وجيعه
