قصيدة رثاء لحضرة سيدي صاحب السمو الملكي الأمير فيصل بن فهد بن عبدالعزيز رحمه الله

علمٍ لفاني خدر القلب تخدير وضيق علي فجوج كل الجزيرة واصبحت محتارٍ وادير التفاكير والمشكلة صارت علي كبيرة قالوا توفى واحد من المشاهير ولو الامر بيدي تمنيت غيره فيصل عريب الساس نسل المناعير ولد الزعيم اللي يقود المسيرة ولد الزعيم اللي يقود الطوابير فهد العرب بالضيق حامي قصيره فيصل ابو نواف ريف الخطاطير ريف الضعيف اللي يدينه قصيره في كل محفل باين له تباشير مثل العلم عالي فعوله شهيرة قايد شباب العرب فعلٍ وتدبير دايم على الطولات عينه سهيره مواقفه بالضيق مثل الاساطير هوفزعة المضيوم وايضاً نصيره له في قلوب الشعب حبٍ وتقدير تبكي عليه الناس في كل ديره كريم يمنى مايهاب المخاسير واللي لجا بحماه لازم يجيره وحتى اليتامى والضعوف المقاصير والجار والمرضان ينعم بخيره مرحوم ابو نواف يافاعل الخير عساه يحظى في جنانٍ نضيره لو كان فيصل مات هذى المقادير بقلوبنا ذكراه تبقى الذخيره