يالله ياللي له عباده يصلون
يامن فرض حجه وصوم رمضانا
ياوامرن وأمره في الكاف والنون
ياواحدن من مد فضله عطانا
وياخالقن خلقه وياعالم الكون
ويافارج هموم القلوب الحزانا
تفرج لمن كنه بهالكون مسجون
ولا كما من ذاق مر الهوانا
عز الله اني في هالايام محزون
ورجاي يالله مايخيب رجانا
بكيت فيصل والمخاليق يبكون
وبكوا على فيصل جميع قصرانا
حزني عميق وبين الاضلاع مدفون
عقب الفقيد الله يجبر عزانا
الموت حق وللمخاليق مسنون
وحقه علينا اليوم صادق دعانا
ادعوا لفيصل ياهل الخير تكفون
ادعوا لابو نواف سر وعلانا
عساه بالجنة عن النار مصيون
لعل مسكانه فسيح الجنانا
اللي يدينه من سخا الجود يعطون
عطاه كاسي كل بقع ومكانا
زبن اليتيم اللي من الوقت مغبون
وريف الضعيف اللي وطاه الزمانا
كلن فقد راع الوفا راعي العون
ماهو وطنا بس حتى اصدقانا
كل الدول عبر الاذاعات ينعون
من زود اساهم شاركونا اسانا
وصلاة ربي عد ناسن يلبون
على نبين للشريعة قدانا
