علم سمعنابه فجعنا فجيعه
هز البدن والفكر والقلب والعين
لديت ثم اصغيت للي يذيعه
كنه يشطب بسرة القلب سكين
قمت وقعدت ولاش عندي ذريعه
ماغير ألد اخلاف ويسار ويمين
أدير فكري والحكي مااستطيعه
تخنقني العبرة ولانطق بحرفين
بكيت أنا والبيت يبكي جميعه
مالومهم لو صاح الادنا والأقصين
فقدان ابو نواف من يستطيعه
مالومكم ياللي بكيتوا حزينين
تبكون شيخ دايم في الطليعه
راعي الوفا والجود غيث المساكين
فعل المكارم ريف قلبه ربيعه
يحرص عليها لو يخسر الملايين
ياما عطا واشبع نفوس مجيعه
وياما بذل لله وأوفا من الدين
طبيعة يازينها من طبيعه
حاز الصفات الطيبة كلها عين
فجعوا ببو نواف فجعة شنيعه
في ساعة ودع وخلى المحبين
انا أدري ان الموت حق وشريعه
لاشك باهل الطيب ما الناس مصخين
موتك يابو نواف غبن وهزيعه
بس البشر عما قضى الله عجزين
بكت عليك اعيون نجد الوسيعة
هلت دموع الحزن والليل ليلين
قبل أمس في الاردن تشيل الرضيعه
مابين كفك والصدر والذراعين
واليوم أخذ راعي الوداعة وديعه
واقفوا بها فوق النعش للمصلين
صلوا صلاة بلا ركوع سريعه
وشالوه يم القبر حزنا وعجلين
يقطعك يادنيا الغدر والخديعه
وراك بالطيب وربعه تغدرين
مات الأمير اللي شبوحه رفيعه
له نظرة عليا وفعل السلاطين
حر تسلسل من سلايل ربيعه
اولاد مقرن نصرة الحق والدين
عسى نبي الله محمد شفيعه
لاجا نهار فيه نصب الموازين
واجبر عزا كل القلوب الوجيعه
يارب وارحم فيصل قولوا آمين
خالص عزانا للحصون المنيعه
حكامنا في ساعة العسر واللين
