مامت ياحي بذكرك وطاريك
خلدت يافيصل حياتك بذكراك
تشهد لك أفعالك وأبيض مساعيك
وقلوب ناسٍ مانست مديمناك
فيك الوفا والجود أعظم مواريك
مرحوم يا للي ماتعدد سجاياك
ملاذ للمحتاج نصر لعانيك
كم عاجز همه تبدد لياجاك
دموع اليتامى والمساكين تبكيك
اصدق دليل آخر مواقف بدنياك
روح الشهامة والأمانة مياديك
أنبل معاني رمزها طيب خطاك
بنيت صرح للرياضة بأراضيك
باخلاص توجته برايك ومبداك
رفعت رايتها بهمة معاليك
عن عز دارك ماوقف صعب وأضناك
النصر حققته بعزمك لاهاليك
في كل محفل درب الأمجاد ممشاك
لو إن مالك غير هذا يكفيك
من قبل ماشهد فيه تشهدله إعداك
مرحوم يامن كل نفس لقت فيك
عز لها عن ضيم الأيام تنصاك
مرحوم يامن للمراجل هقاويك
أجيال تفخر باللي مثل شدواك
مرحوم يامير كثيرة حسانيك
يالله عسى في جنة الخلد مثواك
تدعي لك قلوب عزاها بطاريك
مرحوم يامخلد حياتك بذكراك
