تعيش يابو فيصل لفيصل أنجبت
مثلك ملكنا بالغلا طيبه الدين
بمّي وأخوي ووالدي حزن جربت
وحزني بأبو نواف فاق العزيزين
بالثلث الاول من شهر خمسة السبت
فجيعة ياكبرها عام عشرين
ساد الذهول ومن إدراكي تسيبت
خارت قواي بمجلسي الله يعين
عدي صويب بالسهم طحت وانصبت
وقع الخبر كالصاعقة بي براكين
عيا يهديني على متنى الربت
فوف تراعد احضنوني معزين
لقمة سموتي بالمرارة بها نبت
مر الشري في عيشتي بالبراهين
شحذت صوتي وين عني تغيبت
بأعنف فجيعة وين صوتي غدى وين؟
يادمع وينك ليه بي ما تصببت
بساعة بيان الموت ماتغرق العين؟
أخف لي من ونة لجلها ذبت
عدي جليد القايلة بين نارين
لولا إيماني بالولي حيل حسبت
في نعمة الاسلام يمنعني الدين
إلا أشقق ملبسي بالعراء سبت
وأتيه عاري جسم في حزني سنين
لو انت تدري بالغلا ناسك ألهبت
ساعة رحيلك عن فنانا للاقصين
ياليت شفت بساعة شمسنا أحجبت
حزن تلحف ظهرنا دمع باكين
ياكود يافيصل نهضت وتجاوبت
في حب ماناحوك ناس حزينين
لكن بحكم الله ياميرنا غبت
في حكم من حكمه به الخلق ماشين
أحسن ماقول بدعوتي جعلني صبت
يا ابو اسير الشوق بجنان علّين
الله يثيبك عد ما احسنت وأوهبت
كل الحساني ضعفها بالموازين
الله يعوضنا براسك بما نجبت
نواف وخالد كنهم انت باقين
ويحمى فهدنا من أصلابه تنجبت
مثله ملكت قلوبنا طيبك الدين
