المملكة ودعت فيصل امير الشباب
المملكة من فراقه هلت دموعها
عليك يا اللي كسبت المجد من كل باب
قلوبنا من فراقك طفت شموعها
نعزي الفهد ابونا اللي يحل الصعاب
نعزي الفهد وآل سعود مجموعها
نعزي اخوان أبو نواف ذيب الذياب
ونعزي أولاد شيخٍ طبعه طبوعها
تبكي عليك الجزيرة والسهل والهضاب
تبكيك نجد وجميع الدار وربوعها
تبكيك يامير وديان الوطن والشعاب
وتبكيك كل القرى والمدن وزروعها
يبكيك شعبٍ حزين ومومنٍ بالمصاب
لو كان وسط القلوب الحزن ويلوعها
يبكي عليك المريض اللي يقاسي عذاب
وتبكيك كل النفوس اللي شكت جوعها
يبكي عليك اليتيم ومن بجسمه عياب
وأم اليتامى تعيش الهم ويروعها
مرحوم يامير ياحلال كرب المصاب
كم حالةٍ حل أبو نواف موضوعها
يا الله عسى ماعمل يلقاه يوم الحساب
في جنةٍ مع طريق الخير مشروعها
عساه فايز وياخذ باليمين الكتاب
يا الله يا اللي لك الأرواح ورجوعها
