ليه السحاب اليا بكى يسعد الناس

هوه يهل الدمع وهم يضحكوني

ياما أغرب الموقف على كل حساس

وليا ضحك من ضحكته يزعلوني

يبغوه دايم يذرف الدمع محتاس

حزنه مطر وهموم قلبه مزوني

يبكي السحاب ولا حد قال لا باس

أنا الوحيد اللي يحرك شجوني

بيني وبينه يجمع الحزن والياس

يشكي وأنا اشكي يوم خابت ظنوني

دمع السحايب وقت تنهيد الأنفاس

صرخة وفيٍّ في زمانٍ يخوني

خلا السما شقق جديدات الألباس

ويصيح بأعلى الصوت صابه جنوني

كل البشر سمعوا وشافوا وخراس

ما فيهم اللي قال لا ما تهوني

ولو قابل إنسان معه ذرة إحساس

كان أنشده يا دمع وين العيوني

في لحظة الأحزان ما عندك أوناس

ما فيه مخلوق تعرفه يموني

ذي حالتي ما بين فكر وهوجاس

في لحظة كل المعارف نسوني