أبمسحك من عالمي وانهي الدور
واشفي شقا قلبٍ حياته بدونك
عتمت ظلامٍ وانبلج عقبها النور
غطت نوايا بالخفا من يخونك
كنت احسبك غايات وإحساس واشعور
كنت اعشقك واهواك حتى جنونك
ياما نثرت بدربك الورد وزهور
وياما تغنت بالقصايد إلحونك
وياما رسمت الحلم وياك مغرور
ظنيت حلمي مرتسم في عيونك
يومك بعيني معتلي هامة الطور
ما اسمع وشاةٍ حاولوا يبعدونك
لين اتضح لي وانكشف كل مستور
خيَّبت ظني والمصادر ظنونك
اثرك سرابٍ في متاهات وادهور
حتى الصحارى ما تمنَّت مزونك
لو انصدمت بواقع الحال مبهور
ماني لك المحتاج ما اقول عونك
بسلى واغادر وانتحي حيل مجبور
كل الجروح بداخلي ما يبونك
عشها حياتك كاسف البال مقهور
خلّ العواذل بعدنا يحتمونك
ما عاد قلبي مهتني فيك محصور
بعت الوفي اللي بدمه يصونك
حبك غدى في عالم الأمس مقبور
بيدك جنيتي واشتريتي كفونك
