لو الثمن في شوفتي لك قصيده

ما همني بالشعر غير الكتابه

بس الثمن مني جروحٍ جديده

غير القديم اللي يزيد التهابه

موتي دنى عسى حياتك مديده

يفداك عمرٍ منك زايد صوابه

قلبي ما هو صخرة ولا هو حديده

دم ولحم تنزف عروقه صبابه

ما فيه نقطة دم داخل وريده

إلا انت معها في ذهابه وإيابه

بعد اللقا شفت المسافة بعيده

ليل الفرح غايب وطوّل غيابه

تجمعت كل الظروف العنيده

والصبر عجزت لا توصل ركابه

يانفس ما انتِ في غرامك وحيده

لأهل الغرام الحب ياوسع بابه

رجوى العطايا من يدينٍ زهيده

صنعة غشيم ما عرف ويش حسابه

وموتٍ على العزة لنفسٍ شهيده

احسن من الذلة وعيش الغلابه

ياحيرة العطشان ياويش بايده

زود ظماه القيظ مدري سرابه

وداع من لا قال جمله مفيده

مدري سؤال الجرح وإلا جوابه