شاع الخبر يازين والسد منباح
وامر الهوى يازين لابد مفضوح
راع الهوى لو عاش شهرين مرتاح
لابد ما يصبح من الحب مذبوح
اليوم أنا في شبابي والعزم طاح
وامسيت من كثر الهواجيس مطروح
ان جيت ابرقد شفت برق السهر لاح
والدمع من همي على الخد مسفوح
وان جيت لي مجلس للعقل سراح
والناس من حولي لها ضحك ومزوح
ما عاد لي طريق على درب الأفراح
ولا عاد لي قلب ولا عاد لي روح
الين اشوفك قرة العين وارتاح
وانسى زمان كنت أنا فيه مجروح
الله من وقت به الصدق فضاح
والله من هرج بالاكذاب مملوح
كم واحد تلقاه للسر فضاح
وكم واحد قلبه للاحقاد مفتوح
وراع الهوى ياناس معذورا لو صاح
ما أحد يلومه والخطأ منه مسموح
