عز الله إني كنت حاسب للايام

ويوم المفارق كنت حاسب حسابه

ادري ليا داوت تعجل بالاسقام

وادري هنا ها يختلط به عذابه

وادري مواصلها من العام قدّام

وان قلت طاب الوقت بان الردى به

ما دار ياوقتي على حبها عام

مثل النبات اللي تمره سحابه

عز الفواد اللي غدا عشرة أقسام

يبغى يجور وجور وقته غدا به

الله على جور الليالي والايام

ما بقت بروس النشاما صلابه

والله ما عاد المقادير تنلام

اللوم والله لوم بعض الكتابه

طاح الرجا وامسيت في طي الاحلام

يا واحد بيني وبينك قرابه

لك خافق وان قال وان طاح وان قام

ما تنفعه والوقت راكز حرابه

لو انها على الحب تاطاه الاقدام

غير البلا حب وحميّه ولابه

ولو كان حبي ما عرف نوع الاجرام

حب يتيم,, ومات بأول شبابه