يقول اللي من الصبح ما زاره لذيذ النوم

أدير الفكر بالحاضر وأعوّد فيه للماضي

أقارن بين عصر فات عصر أجدادنا واليوم

وألاقي فرق شاسع واعتبرنا ناس حضاضي

زمان فات,, سلب ونهب فيه القوم ضد القوم

تعيش الناس عيشة فقر,, من فزعة لمركاضي

ولكن بامر ربٍ ساق من صوب البحور غيوم

بعث لبلادنا سيفٍ على روس العدى ماضي

بعث عبدالعزيز ولا معه غير أربعين قروم

فتح حصن الرياض وبشر اللي قبل مغتاضي

حكم بالعدل جازى كل ظالم وانصف المظلوم

جعل شعبه بالأمن يعيش وبما صار له راضي

وبعد ما اختاره الله جانبه داعين يالمرحوم

عسى مسكنك يالنايف جنان طوال وعراضي

وحكم بعده رجالٍ يبذلون الروح باول سوم

حمو هذا الوطن بالسيف حاموا دون الأعراضي

على نهجه مشوا مافي وطنا واحدٍ مهموم

توفر كل شي وعمروا هذيك الأنقاضي

مثل ما يسكن الحاكم تشوفه يسكن المحكوم

عساه يدوم حكم أهل الوفا ما عنه نعتاضي

عسى من مات منهم يرحمه من سعف المضيوم

مسكنهم جنة الفردوس بين أنهار ورياضي

وللباقين طول العمر للدين الحنيف سهوم

غيورين عليه بكل ديره عينوا قاضي