يتك على رعشة هدب جيتك على رجفة خفوق

جيتك ادوّر لهفتي واسأل واشوف أخبارها

جيتك وانا كلي تعب أغفي على طيفك وافوق

جيتك أواسي عبرتي واطفي بقايا نارها

جيتك على جذوة لهب جيتك على صهوة سبوق

جيتك أجامل دمعتي وانهي غريب أطوارها

قالوا علامك مغترب لك في السفر خيلٍ ونوق

قلت السفر هو بكرتي هو فحلها وحوارها

العمر تاليه اقترب يالله عساها ماتعوق

يالله عساها دنيتي تبنى قضاض جدارها

عقب الخطا مابه عتب دام الخطا رمح زروق

الله مااقوى طعنتي لامن طغى مسمارها

الحظ ياحظي انكتب خلك على الفزعة سبوق

خلك معي في رحلتي تنفض كثير غبارها

تبت يد الخاين وتب التافه النذل المروق

يالله تقبل دعوتي واقمع جميع اشرارها

الشوق في عيني نضب والهم في قلبي امخلوق

والحزن داهم خلوتي وطفّى جميع انوارها

ياغالية وين الهدب وين الملامح والخفوق

هاتي بقايا لهفتي لاتطمسين اخبارها