الهوى والحب ميدان القصايد

من زمن قيس وهواه,, العامريه

لا تحده لا سلوم ولا عوايد

حب في وضح النقا ما هو رزيه

يا هنوف بددت نوم الوسايد

كل جفن من السهر ينخي خويه

الكرى فارق وحزاته بعايد

لاذكرت ام العيون النرجسيه

جوهره زانت بها كل القلايد

فاتنة لعيونها صرت الضحية

الحلا فيها عن الخفرات زايد

قبله,, ونظره,, وسحر وجاذبية

الغلا في زوج والشوق امتزايد

مالي بكتم المشاعر مقدريه

مرهف الاحساس والاحساس كايد

ماني من اللي مشاعرهم غبيه

ميته حزة رخا,, ولا شدايد

ما تحرك لو توقدها صليه

ولا انا قلبي تحركه النوايد

كل ما هبت نسانيس عذيه

كيف واللي قصرها بالقلب شايد

تختصر معنى الوفا والحب فيه

ولعتني واشعلت شعري قصايد

مثل ما سوت بقيس العامريه