الشعر للشاعر عمامه وملبوس
وكلٍّ على كيفه يفصل لباسه
كلٍّ على معنى معانيه مقيوس
شعره بضمونه عليه انعكاسه
من كان شعره بالتفاهات متروس
بلواه تاليها تعوِّد لراسه
بعض الملا في جوفه الشر مغروس
بلاه مزمن ما يونِّي عطاسه
هرج القفى والنم يشريه بفلوس
والكلمه الشينه بعرفه فراسه
هذاك في عُرف الاجاويد فيروس
نبات شر اطلب من الله يباسه
والطيب يا شعّار مطلب وناموس
راعيه غانم بين ربعه وناسه
ترا الذي في وجهه الطيب ملموس
كل الملا تاقف معه عند باسه
نظمت عشر ابيات من صدق هاجوس
تعبير موجز والنصيحه أساسه
يفهمني الفاهم وبعض الملا سُوس
يجوز فيهم ما تفيد الدراسه