لا تعتبرني شي غير إني انسان
أحس مثلك واشتكي واتألم
أنا مثل هالخلق راضي وزعلان
يوم انتشى شوق ويوم احتسى هم
زفيت لك نفسي على كف ولهان
ولا حسبت حساب للعيب والذم
بعض الغلا يسلب له عقول واذهان
كنه على قلوب المجاريح مرهم
وبعض الغلا ما غير ذكرى وسلوان
ما منه غير الويل والهم والغم
أحيان أكفكف دمعتي وافشل احيان
واللي تخونه دمعته صعب يكتم
فيني من صروف الليالي والازمان
جرح اذا شفته تقول يتكلم
إلى متى يا قلب تشقى وتنهان
ياقلب ليتك من عذابي تعلم
ليت الشقا مخلوق في هيئة انسان
من شان ارد الدين والثار والدم
