سامرت نجم سهيل لين إبتدا الصبح
اقلّب جروحي على جمر فرقاك
أسري مع الهاجوس واتعبني الجرح
يوم الزمن عيَّا عن البعد ينهاك
لولا الغرام وقصة الزاد والملح
ماقلت قلبي والمعاليق تفداك
في ذمتي يازين تساهل المدح
لو أتعبت رجلي مشاوير مسراك
من يعترف بالذنب قدم له الصفح
دام القدر جابه على درب ممشاك
من يوم شوفك صار في ناظري لمح
وش عاد تنفعني تفاصيل ذكراك
ياللي كتبت الجمع في صفحة الطرح
معاد أفرَّق بين وصلك وجفواك
بقلبك عبير الشوق معادله نفح
ليت الجفا يشرا واجافيك وانساك
لاصار من يهواك يكتب له الذبح
خوفي يكون القلب آخر ضحاياك
اللي عطاك القلب تهدي له الرمح
مدري وراك اليوم شحَّت عطاياك
