نشرنا الاسبوع الماضي لغزاً كتبه الشاعر مشاري خالد الدعجاني يقول فيه

بطنه كبير وطول الأيام جوعان وحلقه تحت بطنه تراها غريبه يستعملونه كل حضرٍ وبدوان ملزوم لا جت حاجة له نجيبه

وقد وصلت الحلول الصحيحة التالية:

انشهد ان اللغز وافي ومليان نظم الدعجاني في بيوت عجيبة هذا هو المحقان ولا نيب غلطان وهذا جوابه للنشاما نجيبه يا زين بطنه والسمن فيه يا فلان عكه ورا عكه وتسمع صبيبه

محمد عبد العزيز الخنيفر

مشاري الخالد وزنها بميزان عادت مشاري كل جزل يجيبه من لا يجازي راع الاحسان بحسان مكروه يا راع الوفا وش نبيبه لو قيل خذها القصر مفروش مجان تراه جارك نذر ما سكن قريبه اذنه تسمع للنميمة ومحقان رخواً لسانه كل شين ايحكيبه

الزلفاوي/ الزلفي

يوم المهندس هندس اللغز بتقان بأمر الولي لو صعب حنا نجيبه الخط ما ياصل على غير عنوان والهاتف اللي فاصله وش نبيبه اللغز حله قمع ماني بغلطان واذا غلط يدفع مشاري ضريبه

موسم بن سفر القثامي / الطائف

اللغز حله يا فتى الجود محقان دورٍ مضى تلقاه عند الحبيبه عند العذاري مكرماته بالاحسان مبصوط وسط البيت يشرب رويبه واليوم وسط الزيت محذوف ومهان الله بلاه بناس ما تعتنيبه

دخيل فضي الشملاني العنزي / الرياض

بتراثنا الشعبي نشر لغز فهمان صاغه مشاري على ربى يثيبه والحل جبته بعد فكرة محقان لولاه كان الزيت يكثر صبيبه

عبد الله أبو لحسه / ضرماء

يا مرحبا ما غردن فوق الاغصان يا شاعر جزل المعاني نصيبه اليا بغاها ما تكوده بليهان قدام تفكيره تهون الصعيبة عز الله انه يا هل الفزعة احصان نسل الحرار بذكرهم فاح طيبه ما هوب مثل اللي حقنها بمحقان يضيع صافيها ويشرب سريبه

محمد عبد الكريم الغزي / الزلفي

سر يا قلم ونقش على سلك الألحان تحية بين الحبيب وحبيبه سجل وخلك بالمكاتيب عجلان لاهل العلوم الطيبات العجيبة اللغز حله يا فتى الجود محقان حسب الحروف الشاهدات العريبه

نافع الحربي / الرياض

للشعر يا هل الشعر ساسٍ وعمدان وله شجرة يا هل المعاني عريبة منها تعرف الفرق لا جيت شفقان اي القراح البكر وأي السريبه والشعر نبض احساس قلب ووجدان غصب يهز القلب لا جا نديبه وان كان ما هز المشاعر فلا كان شعرٍ علينا فارضينه غصيبه من شاعر يركب بلا سرج وعنان دايم كما (المحقان) كلش يجيبه

فهد الجروان / الزلفي

يا مرحبا باللي بدع زين الألحان أقولها برضاي ما هي غصيبه اللغز حله كان ما نيب غلطان محقان ما ب الحل شك وريبه

مالك محمد عبد الله النصار / الجوف سكاكا

حيك يا بو خالد عدد رش الأمزان من شاعر يفرح ليا جت من قريبه اللغز واضح ما يبي زود تبيان وفيت ثم اوفيت في هالمصيبه يصعب غيار الزيت من دون محقان واللي فتح بنشر يجيك يعديبه

ماجد بادي الدعجاني

انا اشهد ان اللغز غاية ونيشان للي بدا لغزه بفكره صعيبه ترى المحاقن فارغة طول الازمان ما تمتلي والله حاجة عجيبة

فرحان شعيب الرشيدي

اللغز حله يا مشاري لنا بان ما فيه لا شك ولا فيه ريبه في ما مضى موجود في كل الأوطان واليوم ضاع وقل من يعتني به والزيت في الماطور من دون محقان ما ينحقن يأهل العقول اللبيبه

سعود بن شنار السهلي / الدرعي

يالله ياللي خالق الأنس والجان ترحم عبادك والدعاء تستجيبه تعجل علينا بالمطر غيث الأوطان وتسيّل الوادي وتملا شعيبه أظن لغزك يا بن الأجواد لي بان المحقن اللي ليا بغيته تجيبه

عبد المجيد جزاء المغيري /وادي الرشا

حلقه صغير ولا مشى فيه شريان ويشرب من الصافي ويشرب سريبه اكيد ما به شك ذا وصف محقان ما طب بطنه ما كتب من نصيبه حميد بن موسى السليمي /الرياض موروثنا الشعبي شغل كل الأذهان عبر الجزيرة جاء من يعتنيبه واللغز حله بكتبه عقب ما بان محقان وانهى شرحنا واكتفي به

محمد هذال آل بريك الدوسري /الرياض

لغزك يا بو خالد به اشكال والوان وأن سلم راسي يا مشاري لجيبه دليت دربه دون نشده وعنوان لقيته المحقان يا هو مصيبه ما له مع العالم صداقة وعدوان حلقه بوسط الزيت يصلى لهيبه

فهد الثميري /المجمعة

لغز الذي في بدع الأمثال فنان معناه ياخذ به معاني رهيبه والحل ما يصعب على كل فهمان نحلها ونجيبها باللي هيبه والزيت صبه يا مشاري بمحقان والا أنشر فوق الحديد ولهيبه

محمد بن عبد الله بن موسى البهلال

لغز الدعجاني عارفه ويش ما كان وصفه جميلاً والمعاني قريبه زيت المكينة لا بد فيه نقصان نحضر له المحقان والزيت ندليبه

ماجد منيف الشمري / رفحاء

اللغز فتنه والولع طبع الانسان فكري ولو صديت قام ايحكيبه عبر التراث اللي لها الجود عنوان من يسفه اللي ينشده فيه ريبه يمهندس لا هنت ضيعت محقان لحفظ السوايل يا مشاري نجيبه تم الجواب وجاك ما فيه نقصان يا شوق من شوفه ايداوي صويبه

فهد بن عقيل الطويان / بريدة

يطلع علينا بآخر اسبوع فنان يطرح علينا لغز يكثر طليبه توارده زين القوافي والأوزان صوب التراث اللي سلم من معيبه واليوم زان اللغز والرد به زان يوم لفانا من جريده حبيبه حله غدا يا صاحب اللغز محقان عسى المرامي يا صديقي تصيبه

مبارك بصيلان العتيقي الشراري/طبرجل

ياللي نشرت اللغز في كل الأوطان الحل بين عند منهو يصيبه الحل واضح يا بن الأجواد محقان حلقه تحت بطنه ولاهي غريبة

عبيد فريح الحربي /الرياض

اللغز واضح يا مشاري للاعيان مثل القمر قدام يبدي مغيبه واكبر دليل اسمه عند الناس محقان والبنشري للزيت لازم يجيبه

مساعد بن عبلان ابن شويمس /الرياض

أقرا جديد اللغز والقلب ولهان وبشية المولى سريع نجيبه أقول حله يا هل العرف محقان لا جاء لزومه كلنا نعتنيبه

علي رشيد الرشيد / رياض الخبراء

لغزين طافن يا مشاري وحيران كيف الهدف حلي يجنب مصيبه مدري خلل في بندقي والا الاعيان والا في صنعة لغز الأجواد ريبه واليوم هدف بندقي صار (محقان) يالله عسى في تالي العمر طيبه

محمد المويعزي الحربي / بريدة

للي كتب لغزه تحية وعرفان من قلب صادق دون شك وريبه اللغز حله يا فتى الجود محقان من شاعر يصيب الضريبه

محمد خليف محمد الهويشان / الزلفي

اللغز لأهل الصنف مرمى ونيشان إن فاز ولا جمته في قليبه ما حد بصب الزيت من دون محقان احد حقن به ماه واحد حليبه

سلطان راضي العنزي القصيم /قصيباء

ما غرد القمري بزينات الالحان يا مرحبا باللغز واللي يصيبه والحل عندي يا ابن الاجواد محقان ما فيه غيره والمعاني عجيبه

محمد عبدالله حسن /عنيزة

الحل بيّن قاله فلان وفلان ابين من الشارة براس الجذيبه يا كاتبين اللغز والحل محقان لو تبعدونه قدم عيني قريبه

نجم عبدالله المحيميدي/ عنيزة

يا مرحبا بك عد همال الامزان واعداد ما يفرح حبيب بحبيبه انا اشهد ان اللغز محكم وبطران وغلطان من هو يا السنافي يعيبه أقول انا حله ولا نيب غلطان هذاك محقان عرفنا نجيبه واختامها مني سلام وعرفان للي نظم للغز واللي مجيبه

صالح عبدالله التميمي / الرس

يا اللي كتبت اللغز حطيت نيشان وانا رميت بشاية الله اصيبه عرفت انا مقصدك يا القرم محقان يصب فيه الزيت وايضا الرويبه فيصل بن فهد الراضي / قصيباء اهلا هلا بك عد ما طاح ودان وعد سكان الرياض الحبيبه قريت انا لغزك ومقصدك محقان لاجيت راع الزيت بيده يجيبه

راضي فهد الراضي /القصيم/ قصيباء

قال الذي في حل الالغاز فنان له عادة دايم يصيب الضريبه لغزك هو (المحقان) ياذرب الايمان حل مؤكد دون شك وريبه

شليويح بن نواف بن رمال الشمري /الحدود الشمالية عرعر

بديت باللي عالم كل ما كان الواحد اللي عالم كل غيبه وقريت لغزٍ ناشره طير حوران وحله هو (المحقان) ما هي صعيبه

حسين سبتي المطرفي/ عرعر