عديت في مرقبٍ والذيب يقنب به
اجاوب الذيب لا من جر بلحونه
انا فؤادي ترى الهاجوس يلعب به
تكفون تكفون مثلي لا تقاصونه
قالوا تحب القنص اي بله احبه
هنيت ناس كثيرة ما يحبونه
ناس تنام الضحى للظهر منكبه
ما يعرفون القنص والبروشلونه
حب القنص في شراييني تشرب به
اللي يحب القنص لا لا تعذلونه
يازين مرواحهن يمة اللبه
قدامهم قايد الحملة ويتلونه
يبون وسم قديم ما حداً طبه
واللي على بالهم فلقفر يلقونه
شوف الحباري وجرتهن مع الخبه
يسوى رصيد البنوك اللي يقولونه
يازين صفة شياهينه على الشبه
في حروه القنص والممشى على هونه
واللي على كفه اشقر برقعه ذبه
يشوف شوفاً تراكم ما تشوفونه
من حقه انه يماري به وينصب به
يكفيك قدام فعله شكله ولونه
ترى القنص يا غشيم القنص ذا طبه
هذي طراة القنص ياللي تعرفونه
