يا عيد ليتك تسعد القلب والروح
ليتك نزيل النازفات العطيبه
كم مرةٍ يا عيد مريت وتروح
وكل مرةٍ جرحٍ جديدٍ تجيبه
بين الحنايا داخلي قلب مجروح
من فرقة الغالين زايد نحيبه
ومن شاف دمعي قال من فرح مسفوح
يا عيد جمّع كل خل وحبيبه
يا عيد ليت العمر سبحات ومزوح
ويا ليت تجفاني ليالٍ كئيبه
بتروح بعد ايام ما جبت لي شروح
وبيمل جرحي من تحري طبيبه
وبمل انا من كثرة الهم والنوح
وبمل من كثر الغموم الصويبه
ناسٍ تقول العيد ملهاة وفروح
ناس تحب العيد وناسٍ تعيبه
وناسٍ تخاطبني تقول ارضى البوح
وغني قصيدك يا مها وافرحي به
وانا اقول اليوم للعيد مسموح
يومك تجي وخلي معك ما تجيبه
