يا من لقلب دق به كم هوجاس
شاف العجايب والعبر في زمانه
وقت غثاه يشيب العين والراس
يفطن له اللي معه نسبة فطانه
أخذت لي مع ساحل الهم مرواس
مشتاق والمشتاق يمشي بشانه
مغير أفكر وأضرب أخماس باسداس
لو النتيجة خانة دون خانة
سبحان خلاق البشر محصي الناس
كفيلهم وارزاقهم في ضمانه
بعض العرب عقله مع الناس نبراس
هرجه مع العربان ذمة وأمانة
وبعض العرب يمرس مع العالم امراس
يطغي عليه الله يكافي لسانه
والمزح بين الربع له وقت واقياس
وما كل رجال يسولف تكانه
يجرح شعورك واحد ما له إحساس
هالوقت فاودك تطيح الميانه
