تعاند الجرح مع حبي وعذّب بي
قتل غلاك وفرض فرقاك بسهوله
لا تسأل الجرح يوم انه قتل حبي
هذي سواياك ماني عنه مسؤوله
الجرح جرحك وميدان الغلا قلبي
جرحك عظيم وغلاي ايديه مشلوله
ارخيت للجرح حتى انه تمكن بي
هذا الجسد لاكن الارواح مقتوله
هذا هو الغدر طالع لك ومتربي
افكاركم من بعض ماهي بمعزوله
لا تسألن يوم خالف دربكم دربي
دام الغرام انقتل هالدرب وشوله
لعبت بالنار واثر النار تلعب بي
وفي داخلي حلم يعجز حظي يطوله
با اعلى مكانه رفعتك وانت تنزل بي
تحسب رفيع المكانه يسهل نزوله!!
ومن بعد جرحك تجي تسأل على حبي
معقوله الوقت غير فيك معقوله؟
