جيتك بلملم باقي الحب وانساك
وارضي خفوق لوعته الليالي
وارتاح من همك وظلمك وبلواك
واصير عن دنيا المتاهات عالي
خلصت مالي في محبتك وارضاك
وطيت قدرك من رفيع العلالي
اول احبك وارغبك واتمناك
واليوم مالك في حياتي مجالي
عرفت قصدك بالمحبة ومبداك
تبغى التسلي يا عسى ما انت سالي
اللي يسوّي في حبيبه سواياك
حبه يموت وينتهي للزوالي
وبلوم قلبي كيف حبك وناداك
واهداك وقت لو تصورت غالي
وش عاد لو كان الحلا حيل يزهاك
ما ابقى مع اللي بالوفاء ما وفالي
ماضيك ما يشفع وحاضرك ينعاك
ومستقبل الأيام مالك ومالي
ارحل مع النسيان لاعاد طرياك
بلقى بدالك وانت تلقى بدالي
