وياقلبي اللي كنه الضلع أبو مخروق
مقيل المدايد يوم كانن يمرنه
الا واهنيك ماتهيضت يامرزوق
وانا لا ذكرت اللي مضى جبت لي ونه
وانا وان خذيت ايام بين البلد والسوق
با اجر الطويل وبنطل الثوب منجنه
وأنا ما مرادي حب عاشق ولا معشوق
ابالي محلٍ سرّح البدو يرعنه
أبالي محل ينبت الربل والزملوق
تهيضت انا لاشفت نبته من الكنه
وجودي على اللي لاسرح مايباله سوق
عليه الشداد وقربته يابس الشنه
وأنا لوبغيت ادله معاد العب الطاروق
يطري عليه كل ماجيت انا منه
يطري عليه مرقبٍ واقه الزاروق
لاجا الاداما فيه يفرق عددهنه
وياعزتي له يوم فارق مفال النوق
على الرحل والابالركايب يعسنه
ولاواهني اللي شرابه من المطروق
مطرهم مناقع واول العُرب يردنه
وانا يوم افكر مابقالي ولامعلوق
معاليق قلبي محرقة كنها البنة
أبالي محلٍ بين خبه وبين عروق
واباشوف غزلان المها يوم يعطنه
واشوف الدبش واشوف راعٍ معه ملحوق
يرد العشاير واول الخفت فاتنه
تبا مرقبٍ نبته من الوسم يزمي فوق
ويازين ذيدان الحطاطيب يرعنه
وياقلبي اللي كنه الضلع ابو مخروق
مقيل المدايد يوم كانن يمرنه
وياعاذلين القلب معاد فيه عروق
واباطلب ولي العرش يوردني الجنة
