خفف عذابي يا ريش العين وارحم
قلبٍ تولع بك من سنين هاويك
شف قلبي المجروح من غيبتك كم
عانى وقاسى بالهوى من تجافيك
الله واكبر كيف ياخلي السم
تسقيه مضنونك وهو حيل مغليك
عذبتني واشقيت روحي مع الجسم
وخليت عيني دايم الدوم تبكيك
اضمك مع العالم وأنا داخلي هم
مخفيه من بين الضلوع المهاليك
يا ماسهرت الليل وحدي مع النجم
وياماسرت بي هجوس فكري لاراضيك
ليه الجفا يازين والصد والظلم
وانا الذي بالروح والمال شاريك
هاذي ثلاث سنين وانا اتألم
صابر على زود العذاب وبلاويك
عوّد تراني من فراقك محطم
وارحم دموعٍ ياهوى البال ترجيك
وخل شملنا عقب التشتات يلتم
ونقهر عواذلنا ومن هو يعاديك
