يا زين قضية صيفنا في بلدنا
بالمملكة ديرة هل العز والطيب
يا زينها يا حلوها يا سعدنا
نسمة هواها عندنا كنها طيب
واقسم بآيات اللي لوحده عبدنا
الواحد اللي يعلم السر والغيب
إن الوطن غالي ولأجله قصدنا
ورتبت أنا بيوتي على السطر ترتيب
يا عيوننا يا دمنا يا جسدنا
ياعزنا وقت الرخا والتكاريب
يا بلادنا اللي بروضك شهدنا
كل السعادة والفخر والمكاسيب
كم من عدو في بلدنا حسدنا
الله يفكك من عيون الأجانيب
يا ما تصدرنا وياما وردنا
على بيار فيك حلوة مشاريب
ولا فيه ناس مثل ناسك وجدنا
ولا مادح غيرك ولا قايل عيب
أنتِ الوحيدة عندنا لو جحدنا
بقلوبنا حبك من الله مواهيب
دون نتجول فيك رحنا وعدنا
وشفنا السعادة والهنا والتعاجيب
وحكامك اللي مخلصه في وعدنا
حكام ساس ملوك ماهم مناصيب
في حكم أبو فيصل ذخرنا سندنا
فهد فهدنا لارتخن المقاضيب
يفخر به اقصى شعبها وأيضا الأدنى
كم صار له بالطيب ماضي تجاريب
الله يعز ملوكنا هم عمدنا
لا عصبت خطر هل الشر تعصيب
والله يديمك يا بلاد رقدنا
في ظل أمانك ما نخاف العواقيب
وعز الله إنا في وطاك استفدنا
هرج عليه شهود ماهي تكاذيب
يا عز والدنا وعز لولدنا
يا دارنا يا اللي بروس المراقيب
فيك اجتمعنا كلنا ما شردنا
فيك السياحة تطرد الهم ويغيب
عسير حنا في جبالك صعدنا
وشفنا جمال من طبيعة وترحيب
من فضل والي الكون ثم فهدنا
تلقى السعادة ما تعين المراكيب
وصلوا عدد ما بالنواظر شهدنا
على نبي نصب الحق تنصيب
