اراجع صدى صوتك ليا من صوتك غاب
وليا هل تسبق فرحتي رعشة يديني
شفع صوتك الوافي عبث طيفك الكذاب
اشوفك بسمعي,, واشعر انك تناجيني
انا ما خبرت الصوت يستحوذ الالباب
الى ما,, تلون صوتك العذب في عيني
تموّج صداه,, وصرت انا والعذاب احباب
ألملم شتاته,, خايف الناس توحيني
سرى في كياني,, خاطر عاطر جذاب
وليل الذهول يطول,, واقول ممديني
وانا من عذاب الصمت والغربله منصاب
على شاطي الحرمان ملّت عناويني
عطيني دقايق بوح واخذي سنين اعذاب
ترى في رقيق البوح تزهر بساتيني
عطيني امل وأرجيه دام الرجا ما خاب
عطيني شعور اني قريبٍ ويكفيني
نعم ذكرياتي في غرامك بغير حساب
تمر السنين وحبي اكبر من سنيني
