أبي رجل!! ولا أريد أي رجال
أبي وصوفه ماتوصف لثاني
ما ابغاه شكل وكشخه وصاحب أموال!
لأدنى سبب لاملّ مني رماني
أبيه مثل طويق لي ستر وظلال
وعن كل هفوات الزمان يحماني
منبع وفا,, والقى معه راحت البال
يعطيني حقوقي وقدري وشاني
صامد معي حتى لو ان الدهر مال
انسى معه خوفي!! وأحس بأماني
أبيه مثل الوادي اللي ليا سال
قام يتباشر فيه قاصي وداني
لامن مشى يلطم من الجال للجال
سيله حدور ومن بعيد المغاني
بالطيب يسوى له ثمانين رجال
يفزع لمن جاله من البعد عاني
قلته,, ولا ادري وين يرمي بي الفال
العالم الله وش يخبّي زماني
أحلم!! واصور من صدى حلمي آمال
وعلى الولي تحقيق كل الاماني
