توك تعرف انك على الطول مخدوع
توك تعرف ان الهوى ما يباعي
ياما نصحتك قلت مالك على طوع
واليوم عايش في ظلال وضياعي
ياما قريت سطور مختلفت النوع
وضحت لك ان الرسايل خداعي
تحفظ كلام بالقراطيس مطبوع
ويقول احساسي كتبته بوداعي
انا مجرب حب صادق ومشروع
وأعرف هوى اللي ناوين بالقطاعي
تلقاه محرج من سوالك ومصروع
ان قلت له وش تاليت هالمساعي
الحب حبل من الوفاء دوم مصنوع
هذا طرف ضحى وهذا مراعي
الحب من واحد مثل خيط مقطوع
والا عقد مفكوك بحاله صراعي
ان رد عقلك صحت مبلي ومفجوع
وتقول خاين يا ردي الطباعي
الحب نعمة لا يعذب ولا يروع
ما دمت عارف وال اصوله تراعي
