طفا الكهرب وشبيت السراج ودمعتي هلت

تذكرت الزمان اللي مضى من سالف اعوامي

تذكرت المودة والوصل واجباه ماذلت

لغير اللي بكل اسرارها والغيب علامي

تذكرت الحياة اللي مضت يا سرعها زلت

وبيت الطين في لحظه خياله مر قدامي

ذكرت الجدة اتجينا بعد ما للعشا صلت

وحنا نجتمع وسط المجبب عنده ازحامي

حكت باسلوبه العفوي سباحينه ولا ملت

واليامنه بدت بالسالفة نسرح بالاحلامي

تذكرت المهفة والرحا وايدين ما كلت

تذكرت السقاوايد تخضه بين الاقدامي

ذكرت الزير ينقط ماه وبارض حوله ابتلت

مداهيل لنا تشهد عليها بصمة ابهامي

زمن فيه السعادة رغم جوره والشقا حلت

ومن يعشق زمان اول ترى ما هوب ينلامي

حياة راح وقته وانتهت واطلالها ظلت

تقول ان القناعة كنز ما تحصيه الارقامي

وهذي حالة الدنيا بشرحلت بشر ولت

يروح الوقت مع ناسه ولا غير الولي دامي

الا يا الله تكفيني زمان طيبته قلت

واشوف الخير يارب الملا في مقبل ايامي