وقت المفارق هلت دموع عيني

والقلب مهموم ضنا البعد لاعه

لاعدت ياوقت علينا حزيني

ما ابغى مجيك مير ماش استطاعه

فرقت بين اغلى الحبايب وبيني

يقطعك ياوقت قليل النفاعة

وندبت حظي مير عيا يجيني

ابيه يفزع لي ولابه فزاعه

يقول خلك صار ذكرى سنيني

مالك علينا يابن فالح شفاعة

شرع الغرام وسنة العاشقيني

فرقا وجمعا والقناعة قناعة

واقول ابيه وعارف انه يبيني

والقلب من بعده تزايد نزاعه

له كل حبي مع شقاي وحنيني

وقلبي اسير في يدنيه وداعة