الشكر مرفوع لك يا طير حوران

الحمد للّه جزيل الفضل والمنّه

والشكر مرفوع لك يا طير حورانِ

يا سابق بالكرم حليت بالقِنّه

واصبحت رمز الشهامة عالي الشانِ

العايله يا طويل العمر ممتنّه

وكل القرابه بعيد الدار والداني

يدعون لك يارضي النفس بالجنّه

يدعون لك كلهم شيب وشبانِ

يدعو لك اللي بليله يزعج الونّه

اللي رحَمته وًلَد عمي سليمانِ

في تالي الليل وكل العالمِ مرِنِّه

يقول يا الله تديم النائب الثاني

اللي على الرِّمِل والايتام ياحِنِّه

واهل الحوايج يبادرهم بقضيانِ

كم من مريضٍ بنَيَّاته يبكِّنِّه

يرثي لحاله محبِّينٍ وعدوانِ

من شدة امراضه اللي هدِّتِه كِنّه

إلى لمسته حسبته كوم عودانِ

جاه الفرج من ولي العرش يوم انّه

دَرَى عنه راعِيَ النخوه كحيلانِ

أَصدر له الأمر بعلاج وتولَّنِّه

يدين بيضَ الوجوه بلطف وإحسانِ

ذِكرُه الى جاء على الالسن وطَرَّنِّه

يلهج بمعروفه الف لسان ولسانِ

يافاعل الخير بنفوسٍ تَحَرَّنِّه

اللّه يجزاك به عفوٍ وغفرانِ

صلاة ربي على مَن بيَّن السّنّه

ومن جاه مولود فِيسَمّيه سلطانِ