على صدر الرحابة والوفا والشكر والتقدير
كتبت أصدق معاني ما كتب مخلوق باحبابه
بامير لا مدحته بالقوافي جالها تنوير
تعطر به قصيدي بالفخر والقاف غنا به
نعزه كثر ما غرد على خضر الغصون الطير
أمير عن هموم الشعب,, ما والله قفل بابه
أمير بالعدل واكب مسار المجد والتطوير
حرس دار الفهد بالسيف,, وخلاها تذرى به
أمير ما بنى فعله على البهتان والتزوير
بذل ما تملك يدينه لهذا الشعب وترابه
أمير صان هالدره وسوّر حدها تسوير
تهنى بشعبها الوافي,, وهي مثله تهنا به
أمير يعتمد حكمه على الانصاف والتبصير
تحت حكم الفهد يحكم بشرع الله وكتابه
مزايا سيدي طبعاً تفوق الوصف والتعبير
سجاياه الكريمة ما حصرها شعر وكتابه
على اسمه سيدي نايف جهوده ما بها تقصير
وزير الداخلية صار حد السيف ونصابه
تكلم واسمع الدنيا كلام العدل والتيسير
مسح دمع الحزين,, وعوض المفجوع باقرابه
عظيمة وقفة النايف شفتنا وأثبتت للغير
مدى حلمه على الجاهل ما ثارت لاجله اعصابه
تكلم بالحقيقة عن مجال الشك والتشهير
بعيدة نظرته دايم,, حكيم ويوخذ حسابه
طبيعي يخطط اعدانا على الارهاب والتفجير
ولو يضحك لنا الحاقد يذوب السم بانيابه
يبث لفكره المسموم قصد الشر والتدمير
يحاول من شباب المملكة يصطاد مخلابه
نفوس الحقد موجوده لها يدين الحرام تدير
تغرر بالبشر واحيان تلقى من تعشابه
عقوق الأرض والوالد مصيبه ما لها تبرير
عسى ربك يعين اللي بلاه الله على مصابه
مدام انا تحت حكم الفهد,, ننعم بامان وخير
شعار العدل والعزة نصونه ونتعزوى به
