ويش بنت في المره مثل ماهي في الرجال

عايشه وسط البشر من كبير ومن صغير

صانها الرحمن,, سبحان خلاق الجبال

من طبايعها الكرم,, والبخل شي يسير

مايدرّج في ثقيل الحمول إلا الجمال

وما يحدث بالتجارب سوى رجل خبير

قالة قيلت وسارت على درب المثال

وشفت انا فصيلة الدم في ورد وصدير

قال من يبدي جوابه ولله الكمال

والمعاني لاختفت صعبها عندي يسير

كل شخص له فصيلة بدمه واحتمال

ياكريمه او بخيله عقب فحص الخبير

اول ما أبدا بالتحيه قبل حل السؤال

تهنئة بالعيد تحمل معاها كل خير

وآخرالموضوع نضرب على رمز المقال

لين فصيلة الدم تطلع على الراس الطرير

المطر يامبارك ابرك واخير من الزلال

الكلور يخلي الصوديوم مثل العصير

الفصيله تشتبه والبخل لوهو حلال

نكرهه ويحاربه سلمنا وامره خطير

يالحميدي كيف حظي معك ماله مجال

كل ماسقته مع الدرب عيا لايسير

ويابن عامر مرحبا بك عدد وبل الخيال

الفصيلة حل لغزك عسى دربك يسير

يا اهل المعروف يالطيبين امن الرجال

كلمة يشهد بها العيد باليوم السرير

شاقني لغز على صدر وافية الجمال

من فصيلة دمها تسقي العلم الغزير

دامت افراح الجزيرة على مر الليال

يا عليم بالخفايا وماكن الضمير

لغز الاسبوع اتضح والمعرفة راس مال

كل دم له فصيلة بتحليل الخبير

مرحبا ترحيبة فيك ياولد الحلال

يوم جبت اللغز قلنا عسى مقسوم خير

هاك حله ياولد عامر بليا جدال

الفصيلة عايشه وسط دمك لاتحير

غايتي ومناي في قرب سمحين القبال

الرجال اللي على الطيب ماقفهم شهير

الجمالة,, والجمايل,, لهم سلم وخصال

ماتغيرهم فصيلة ولا هرجه مشير

مرحبا بك عد ماهب نسناس الشمال

وحل لغزك نعرفه عندنا ماهو عسير

والاجابه يابن عامر على قدر السؤال

كل دمٍ له فصيلة ويعرفها الخبير