للهوى في عيون اللي وقع به معالم

ما يثبت عيونه صوب وجه الغريب

يخطف الشوف خطف وللبكا دوم والم

لو تصبر وحاول دمع عينه قريب

قلبي اللي عشق ليته من العشق سالم

ما نفع به علاج ولا نفع به طبيب

يا الله اني سألتك وانت بالحال عالم

تشفي القلب من جرح بوسطه عطيب

كنت انا بالسعادة مع هوى البال حالم

واثر حكم القدر عني يغيب الحبيب

آه واحر قلبي حرة الزير سالم

يوم جساس يغدرفي شقيقه كليب

الهوى مثل غب ما تطوله سلالم

شمس من هو وقع به مخطر انه تغيب

اشهد ان الهوى للي وقع فيه ظالم

دايم الدوم بالعشاق فعله عجيب