منهو يلوم القلب من عقب فرقاك
واليوم منهوبالبشر حق يرثيك
يرثيك شعبٍ حافظٍ لك عطاياك
جعل الولي من رحمته زود يعطيك
كم من فقيرٍ ينشد اليوم يمناك
وكم طالبٍ ينشد عن آخر فتاويك
وكم من كتابٍ يرفع الصوت ينعاك
يذكر لك أفعالك ويذكر مساعيك
لو هي فداوي كان الأرواح تفداك
لاشك حكم الرب ما فيه تحريك
شيخٍ جليل ومن قديمٍ عرفناك
لو نرخص الغالي حشا ما نوفيّك
يا ما وياما بالمحافل شهدناك
تقضي بها ايامك وتقضي لياليك
إن رحت لعنيزة تذكرت مرباك
وان صرت بالزلفي تذكرت ماضيك
واليوم والله يا محمد فقدناك
والعين تبكي والبكا مايجازيك
لاشك غصبٍ يا محمد بكيناك
والعين ما حدٍ لامها يوم تبكيك
إن مت والله ما أظنا نسيناك
نذكرك بالدعوه عساها تباريك
العام ابن بازٍ شبيهك وشرواك
واليوم ترحل ذكّر الباز طاريك
جعل المرض يومه يصيبك ويغشاك
يجعله ربي طهرةٍ منه تكسيك
مرٍ شربته يا عسى الرب يجزاك
شربه من الكوثر حلاها يكفّيك
يا الله عسى قبرٍ يضمك ويحواك
يجعله ربي روضةٍ تفتخر فيك
ويا الله عسى في جنة الخلد مثواك
تلقى بها شيٍ يسرك ويرضيك
غاب القمر والشمس والوقت فتاك
والموت حقٍ والليالي محابيك
يا الله يا اللي كلنا نطلب ارضاك
اخلف علينا من يخافك ويرجيك
