عقب العساسه عن هاك الدرب خيرت

اعماس كيف ولا بهار بثومي

اليابغيت امشي على الدرب نورت

وعرفت وش قدمي بليل كتومي

واليا عرفت اللي على الدرب واسفرت

وقريت لوحاته وشفت الرقومي

اما معه سافرت ما عاد شاورت

والا جلست ولا السفر بمحتومي

اوشفت اخير منه غيره وغيرت

حتى لو اني قد دفعت الرسومي

ارجع مدامي غاديٍ لو تخسرت

والعرف نوب من الخسارة يقومي

ولصافي الرفقه من الناس دورت

شبل سنافي حكيم فهومي

لن جيت له سرك ولن جاك سررت

عندك حشيم وانت منه محشومي

بمرافقه كنك لحاجتك وفرت

اصفى ذهب واغلاه عما عمومي

دامه حزامك للشواهيق شهرت

حر ولد حر حرير سمومي

ما هو الذي لا قست عقله وعايرت

لقيت مسكين لنفسه يزومي

الرجل لا ما اوحيت قوله وفسرت

الثوب ما ماليه غير الجرومي

لا تنخدع بجروم ناس تكابرت

نوب ترى الجوهر يصير معدومي

ماكل من شفته لعنتر تصورت

قبل الدلايل لا تصدر حكومي

لا تقول وانت من الزلل ما تحذرت

تصبح على قولك وعلمك ندومي

تراك لا مثبت قولك وبررت

فتحت باب للخطا والخصومي

ورجعتك ما هي هينه لا توعرت

ولو حصلت ماهي على ما ترومي

وش عاد لاونك عقب جيت غادرت

لأفضل انك ما تجي بك وهومي