الصاحب اللي حياتي له وعمري له
الا العباده فهي لله سبحانه
عذب السجايا عديم الوصف كلي له
من دون حبه حياتي ما لها خانه
حبه ملكني وانا ياكثر حبي له
الفاتن اللي قسى بقلوب خلانه
ما غاب عن ناظري زوله ولا ليله
ولا تهنيت في نومي على شانه
بالليل همي يجيني مسرج خيله
يفر فكري وتبقى العين سهرانه
يحتار فكري وعيني مالها حيله
والروح لمواصل الغالين ولهانه
اقفى وطول ولاجتني مراسيله
اشتقت والنفس من فرقاه حيرانه
غناة قلبي ولو قلت محاصيله
شوفه يبدد هموم القلب واحزانه
الصاحب اللي حياتي له وعمري له
سبحانه رب عطاه الزين سبحانه
